Урматтуу кыргызстандыктар!

Мамлекеттик маанидеги укуктук документтердин сапаттуу которулушун камсыздап, кыргыз тилинин расмий чөйрөдө кеңири колдонулушуна кызмат кылып келе жаткан Кыргыз Республикасынын Министрлер Кабинетинин Котормо борбору жалпыңыздарды 23-сентябрь – Мамлекеттик тил күнү менен чын жүрөктөн куттуктайт!

Кыргыз тили – элибиздин тарыхын, дүйнө таанымын, руханий байлыгын кылымдардан кылымдарга жеткирген улуу мурас. Ал – улуттук өзгөчөлүгүбүздүн өзөгү, муундарды бириктирген руханий көпүрө жана мамлекеттүүлүгүбүздүн маанилүү тиреги.

Мамлекеттик тилдин кадыр-баркы аны күнүмдүк турмушта, билимде, илимде, маданиятта жана мамлекеттик башкарууда кеңири жана сабаттуу колдонуу менен бийиктейт. Кыргыз тили заман менен бирге өнүгүп, коомдук турмуштун бардык чөйрөсүндө толук кандуу кызмат кылышы – жалпыбыздын максатыбыз.

Эне тилибизге болгон урмат ар бирибиздин сөзүбүздөн, ишибизден жана мамилебизден көрүнүп турсун.

Мамлекеттик тил күнү кут болсун!

Кыргыз тилибиздин кадыр-баркы бийик, келечеги кең болсун!